Суперлигада мавсум якунланганидан сўнг барча трансфер ойнаси қачон очилиши ва унда қайси клублар фаол бўлишига қизиқади. Аммо бизда трансфер очилди деган хабар ПФЛ томонидан эълон қилинмади. Бироқ футболчиларга у клуб қизиқди, бу ўйинчи бу жамоага ўтади деган маълумотлар йўқ эмас. Кўпчилик учун қизиқ трансферлар “Бунёдкор” атрофида содир бўлиши кутилмоқда. Жамоани етакчилари тарк этиши ҳам мумкин, ёки акси.

Айни пайтда “қалдирғочлар”нинг икки ҳимоячиси учун “совчи”лар йўқ эмас. Рустамжон Ашурматов ва Акрамжон Комиловга “Пахтакор” ва АГМК қизиқиш билдирмоқда.   

Ушбу кутилаётган трансфер бўйича ПФЛ бош директори маслаҳатчиси маълумотларни тақдим этди.   

- АГМК ва “Пахтакор” футбол клублари “Бунёдкор” ҳимоячилари Акрамжон Комилов ва Рустамжон Ашурматовга кўз тикаётгани борасида хабар ўқидим. Бунда бир нарсани яхшилаб тушуниб олиш керак бўлади.

Мазкур икки футболчи “Бунёдкор” футбол академиясининг тарбияланувчилари ва улар 23 ёшга тўлиб улгурмаган. Демак, агар уларнинг шартномалари “Бунёдкор” билан якунига етган бўлса, талабгор томон футболчилар учун фақатгина машғулотлар учун тўланадиган товон пулини беради, холос. Агар футболчиларнинг “Бунёдкор” билан шартномаси бўлса, юқоридаги суммадан ташқари яна алоҳида трансфер нархи ҳам келишилиши керак.

Бу бандни ФИФА жиддий назорат қилади. Де юре бизнинг регламентда ҳам бор, де факто унга амал қилинмайди (баъзи клублардан ташқари). 2019 йилги мавсумдан бошлаб бу нарса амалда бўлади. Яъни, биз академияларни ривожлантиришни талаб қиляпмизми, демак уларнинг меҳнатини ҳам қадрлашимиз керак. У хоҳ академия бўлсин, хоҳ оддий футбол мактаби, етиштириб берган футболчиси учун ҳақ олиши керак. 

Айни вақтда ички трансфер ҳақида гаплашяпмиз. Бу халқаро трансфердан, айтайлик, Достонбек Ҳамдамовнинг “Анжи” сафига ўтиб кетишидан фарқ қилади. Демак, регламентга қараймиз. Унинг бандларида шундай ёзилган. Агар, футболчи 23 ёшга тўлмаган бўлса ва бошқа клуб ихтиёрига кетаётган бўлса, унинг шу академиядаги ҳар бир йили учун 3 000 000 сўмдан (уч миллион) тўланиши керак.

Агар гап бунда Суперлига футбол клубининг академияси ҳақида кетаётган бўлса, мана шу пул иккига кўпайтирилдаи, яъни, 6 000 000 сўмни (олти миллион) ташкил қилади.

Агар гап бунда терма жамоалар аъзолари ҳақида кетаётган бўлса, юқоридаги суммага яна 50 фоиз устама қўшиб ҳисобланади. Акрамжон Комилов ҳам, Рустамжон Ашурматов ҳам термаларнинг расмий ўйинларида иштирок этиб улгурган. Демак, бир йил учун товон пули 9 000 000 сўмни (тўққиз миллион) ташкил қиляпти.

Акрамжон Комилов ҳам, Рустамжон Ашурматов ҳам “Бунёдкор” футбол академиясида 2009 йилдан буён фаолият юритиб келган. Демак, 9 000 000 сўмни 10га кўпайтирамиз — 90 000 000 сўм (тўқсон миллион). 23 ёшга тўлмаган бу икки футболчининг шартномаси якунига етган бўлса ҳам, шу суммани ўтказмай туриб, бу футболчиларни бошқа клуб рўйхатга олиши мумкин эмас.

Акрамжон Комиловнинг “Бунёдкор” билан шартномаси 2018 йил охирида тугайди. Демак, унда ярим йил олдиндан навбатдаги таклифларни кўриб чиқиш ҳуқуқи бўлган (кўриб чиққан шекилли, “Пахтакор” асосий даъвогар). Шундан келиб чиқиб, исталган клуб “Бунёдкор” ҳисоб рақамига 90 000 000 сўмни тўлаб, уни олиб кетиши мумкин (бу рақам яна бир марта ҳисоблаб чиқилади, албатта). Комилов келаси йилнинг 14 март куни 23 ёшни қарши олади. Қарши олган кундан бошлаб, машғулот учун товон пули ҳақида унутамиз. Қишки трансфер ойнаси Ўзбекистонда шу йилнинг 17 декабрь санасидан бошлаб, келаси йилнинг 7 мартига қадар давом этади. Демак, Комилов учун сумма тўланиши керак.

Рустамжон Ашурматовнинг эса “Бунёдкор” билан яна бир йиллик шартномаси бор. Айтайлик, унинг жигари Бахтиёр Ашурматов бошчилик қилаётган АГМК футболчини қўлга киритишни истаса, 90 000 000 сўмдан ташқари, “Бунёдкор” билан унинг трансфер суммасини ҳам алоҳида келишиши керак бўлади. Агар АГМК яна бир йил кутиб турса, Рустамжон Ашурматовни текинга олиб кетади.

Футбол мухлисларимиз бунда яна бир жиҳатни тушунишлари керак. Агар Акрамжон Комилов ва Рустамжон Ашурматов бошқа клубга ўтиб кетишса ва ўша клуб кейинчалик бу футболчиларни трансфер қилса (яъни, эркин агент сифатида у клубдан бу клубга кўчиб юришмаса), “Бунёдкор” кўрилган фойданинг бир қисмида ўтиради. Чунки айнан шу клуб юқоридаги икки футболчини тарбиялаб берган. Масалан, Неймар учун "Барселона" 222 миллион евронинг ҳаммасини олмаган, маълум қисмини уни тарбия қилган Бразилия футбол клубига ҳам ўтказиб берган.

Агар Акрамжон Комилов ва Рустамжон Ашурматовни хорижий клублар олиб кетишни истаса, бояги 3 ва 90 миллионлик нархлар умуман бошқача ҳисобланади, - дея ёзади Диёр Имомхўжаев.

«SPORTS.uz» сайтида чоп этилган материаллардан нусха кўчириш, тарқатиш ва бошқа шаклларда фойдаланиш фақат таҳририят ёзма розилиги билан амалга оширилиши мумкин.

ТАҲРИРИЯТ ҲАҚИДА

Гувоҳнома: №1002. Муассис: «RENDER SYSTEMS» МЧЖ.

Таҳририят манзили: 100047, Тошкент шаҳри, Истиқбол кўчаси, 15-уй.
Электрон манзил: info@sports.uz.
Телефон: +998 71 233-78-98