SPORTS.uz интернет-ахборот портали мухбири Бахтиёр Тоштемиров жорий мавсумни ажойиб тарзда ўтказаётган ва “Бунёдкор” етакчиларидан бирига айланиб улгурган ҳимоячи Акром Комилов билан суҳбатлашди.

- "Бунёдкор" жамоасининг ёшартирилган таркиби кўрсатаётган ўйин ва эришилаётган ғалабаларнинг асосий сабаби нима? Ҳар холда мавсумлар оралиғида жамоани бир қатор етакчи футболчилар тарк этишди.

- Тўғри, таркибимиз жуда ёш. Лекин, шунга қарамай кетма-кет ғалабаларни қўлга киритаётганимизнинг асосий сабаби катта тажрибага эга бўлган мураббийимизнинг бизни ҳар бир ўйинга тўғри тайёрлай олаётганида. Қолаверса, жамоамизда муҳит аъло даражада. Биз футболчилар бир-биримизни майдонда ҳам, майдондан ташқарида ҳам жуда яхши тушунамиз. Етакчи футболчиларимизнинг жамоадан кетгани мавсум бошида бироз сезилди, лекин ҳозир ҳаммаси изига тушган.

- Янги мавсумдан эътиборан мамлакатимизда Суперлига ташкил этилиши боис ўйинлар сони ошган. Бу футболчиларга қай даражада таъсир кўрсатиши мумкин?

- Очиғи бу ҳақда умуман ўйлаганимиз йўқ. Ҳаёлимиз фақат майдонда ўз кучимизни кўрсатиб, ғалаба қозонишда. Умуман олганда эса ўйинлар сонининг ошиши бу футболчиларга ўзларини кўрсатишлари учун янада кўпроқ имконият беради.

 

- Жамоадаги собиқ тенгдошларингиз Элдор Шомуродов ва Достонбек Хамдамов сингари сизга ҳам хориж клубларидан таклифлар бўлаётгани табиий. Лекин сиз айнан қайси чемпионатда тўп суришни хоҳлаяпсиз? Умуман "Бунёдкор"дан кетишингиз ҳақиқатга қанчалик яқин?

- Ҳа, албатта. “Бунёдкор”даги энг яқин дўстларим Россия чемпионатига йўл олишди. Мен ҳам ўз омадимни Россия премьер-лигасида синаб кўришни истардим. “Қалдирғочлар” сафидан кетишим эса биринчи давра якунида ёки мавсум охирида ҳал бўлади.

 - Суперлига регламентига кўра қайси жамоалар жадвалнинг юқори олтилигидан ўрин олиб, мусобақа чемпионлиги учун кураш олиб боришалари мумкин?

- Бу борада аниқ бир нима дейишим қийин. Чунки, чемпионат эндигина бошланди ва табиийки кўплаб жамоаларда кучли олтиликдан жой олиш имконияти бор. Бу саволга эса 2-давра якунлангач жавоб оламиз.

- Эртага Наманганда “Навбаҳор”га қарши бўлиб ўтадиган муҳим баҳс олдидан фикрларингиз.

- “Навбаҳор”га қарши баҳсда мухлислар билан тўлиб-тошган стадионда ўйнашимизни таҳмин қиляпман. Ушбу ўйин ҳар иккала жамоа учун ҳам жуда муҳим. Боиси, биз жадвалдаги пешқадамлигимизни сақлаб қолиш учун ғалаба қозонишимиз шарт бўлса, наманганликлар кетма-кет мағлубиятлардан сўнг ўз мухлислари қаршисида уч очко қўлга киритишга уриниб кўришади.

«SPORTS.uz» сайтида чоп этилган материаллардан нусха кўчириш, тарқатиш ва бошқа шаклларда фойдаланиш фақат таҳририят ёзма розилиги билан амалга оширилиши мумкин.

ТАҲРИРИЯТ ҲАҚИДА

Гувоҳнома: №1002. Муассис: «RENDER SYSTEMS» МЧЖ.

Таҳририят манзили: 100047, Тошкент шаҳри, Истиқбол кўчаси, 15-уй.
Электрон манзил: info@sports.uz.
Телефон: +998 71 233-78-98